This page has not been proofread
(२४)
फेला पार्ने कठिन त्यसमा सत्यको ज्योति काहीँ
हाँगा हाली लहलह खडा झुटको धूम चाहिँ ।
सारा तारा ग्रह पिलिपिली त्यै धुवाँमा निमग्न
खाली काली जडप्रकृतिको जाड्यलीला छ नग्न ॥
(२५)
ऐले मेरो श्रुति-विवरमा घुम्छ जो शब्दजाल
जोजो देख्छन् नयन अनिदा दृश्य कालो कराल ।
त्यस्मा खाली जटिल धमिलो जाड्य जादूगरी छ
यद् वा कालो नियति-गतिको वञ्चना आसुरी छ ॥
(२६)
कैले देख्छू, जलधि-जलमा विश्व सारा डुबेको
कैले जल्दै अति जहरिलो धूममा त्यो उडेको ।
कैले ईर्ष्या-कलुषित कडा दानवी लम्किझम्की
कैले फोस्रा फगत मुखमा गर्जना, धाक, धम्की ॥
(२७)
कैले देख्छु विलय-विधिको आपसी तम्तयारी
कैले यारी कुटिल कपटी शान्तिको भ्रान्तिधारी ।
यस्तो क्या हो ? किन मगजमा उग्र उद्भ्रान्त भाव
गायो ? जस्ले सकल बदल्यो आज मेरो स्वभाव ॥
