Page:Bhanubhaktako ramayan.pdf/68

आखिर् मर्याँ म हरि देखि मर्या त तर्छू ।
यस् दुष्ट देखि मरिया त नरक् म पर्छू ॥
यस्तो विचार् गरि तहाँ मृगरूप धारी ।
हूकुम् सिरोपर धरी कन भो तयारी ॥६६॥

दौड्यो लिला पनि चरित्र विचित्र गर्दै ।
सीताजिका नजिक गै कन ताहिं फिर्दै ॥
सीतजिलाइ गरुँ मोह भनेर दाग्यो ।
लीला गरी कन वरी परि चर्न लाग्यो ॥६७॥

छल् हो भनी प्रभुजिले पनि चाल पाया ।
एकान्तमा गइ सिता कन काम् अह्राया ॥
सीते अदृश्य भइ लौ बस अग्नि माहाँ ।
छाया सिता पनि बनायर छोड याहाँ ॥६८॥

एक् भिक्षुको रुप लि रावण आज आई ।
हन्र्या छ दुष्ट तिमीलाइ स्वरुप् छपाई ॥
चाँडो अवश्य तिमिले पनि रुप् छपाऊ ।
एक् वर्ष सम्म छपि दिन् तिमिले बिताऊ ॥६९॥

यस्तो हुकुम् सुनि अदृश्य सरूपधारी ।
छाया सिता पनि दुरुस्त गरिन् तयारी ॥
सीता छपी कन रहिन् जब अग्नि माहाँ ।
छाया सिता सँग बस्या रघुनाथ ताहाँ ॥७०॥

छायासिताजि अति चित्र विचित्र मानी ।
खेलाउँ तेस मृगलाइ भनेर ठानी ॥
बिन्ती गरिन् रघुपते मृग आज देऊ ।
खेलाउँछू अधिक जाति छ पक्रि लेऊ ॥७१॥