This page has not been proofread
(४)
गतिविधि फितलो त्यो, चञ्चले बालभाव
सब तृणसरि ठान्ने बादसाही स्वभाव ।
सरस चहक तेरो देखदा दङ्ग पर्थेँ
कलम ! तँकन छैटौँ अङ्गुलीमा म दर्थेँ ॥
(५)
छुनुमुनु गरि मेरा अङ्गुलिभित्र खाली
अलिअलि कविताको रङ्ग-रेखा निकाली ।
कलम ! जति दगुर्थिस् पत्रमा वेगसाथ
उति मनमन भन्थेँ भाग्यमानी छ हात ॥
(६)
यसरि तँसित मेरो मस्कँदा प्रेम-पाश
कलम ! सकल अर्कै रङ्गको भो मिजास ।
रसमय कविताको निम्तिमा दौडधूप
वरपर तलमाथी गर्न थालेँ म खूप ॥
(७)
बिजुलि, वन, बगैँचा, मेघ, नक्षत्र, तारा
ग्रह, जलनिधि, हावा, पर्वत-श्रेणि सारा ।
मतिमय चलनीमा राखि चालेर सार
कलम ! तँकन दिन्थेँ प्रेम-पुष्पोपहार ॥
