This page has not been proofread
प्रतिभा
(१)
प्रतिभा मुटु हो मनुष्यताको
प्रतिभाले पद लिन्छ देवताको ।
प्रतिभा बिजुली-समान चल्छ
प्रतिभाले सब दुःख-दर्द ढल्छ ॥
(२)
प्रतिभामय शास्त्र छन् अनेक
प्रतिभा गर्दछ तत्त्वको विवेक ।
प्रतिभा कविता बनेर खेल्छ
प्रतिभा रङ्ग नयाँनयाँ उकेल्छ ॥
(३)
प्रतिभा दिलमा प्रकाश भर्छ
प्रतिभा दुस्तर अन्धकार हर्छ ।
प्रतिभा सुख-शान्तिको निवास
प्रतिभा गर्दछ सभ्यता-विकास ॥
