This page has not been proofread
(४)
त्यै स्वप्नामा सकल दुनियाँ मस्त भै खेल्न लाग्यो
यो संसारी विषयतिरको सम्झना दूर भाग्यो ।
देख्दा त्यस्तो शयन-सुख वा त्यो श्रमच्छेद-लीला
हुन्छन् मेरो किनकिन कठै ! नेत्र दोटै धमीला ॥
(५)
तृष्णा मेरो पनि छ त्यसमा, नित्य भन्छू निदाऊँ
निद्रालाई तर अब कहाँ देख्न वा भेट्न पाऊँ ?
प्यारी ! निद्रा ! किन पर गयौ ? विन्ति मेरो छ आऊ
भन्दाभन्दै विकल मुटुको उग्र चस्कन्छ घाऊ ॥
(६)
चिम्लूँ भन्छू नयन, सहसा जोरिँदैनन् परेला
जोरी-हालेँ, जिनतिन भने पर्छ अर्कै झमेला ।
नानी भन्छन् किन मुफतमा गर्दछौ द्वार बन्द
आँसू भन्छन् तलतल झरी बग्न द्यौ मन्द मन्द ॥
(७)
उठछू, बस्छु, उस मधुरिमातर्फ उम्लन्छ आशा
जस्ले मेरो अलि दिन बसेथ्यो मुटू-भित्र वास ।
त्यस्तो प्यारो मधुर मुहुनीदार त्यो कान्तिधारा
खोज्दाखोज्दै सब दश दिशा देख्न थालेँ अँध्यारा ॥
