Lalitya bhag 1 ra 2/kopilalai ashwashan

कोपिलालाई आश्वासन

(१)
तँ कोपिला त्यो मुख बन्द तेरो
तँलाई देख्दा मन घुम्छ मेरो ।
ऐले छ त्यो संयमको अवस्था
जस्बाट मिल्नेछ पछी सुबिस्ता ॥

(२)
राखी कडा संयम धैर्य भित्र
साधिन्छ जो काम पछी पवित्र ।
त्यो हुन्छ लोकोत्तर शान्तिवर्षी
जो गर्दथे सिद्ध ठुला महर्षि ॥

(३)
तेरो पनी हालत त्यै छ आज
देख्दै छ त्यो हालत यो समाज ।
वसन्त पर्खी, तँ न हो निराश
निराशतामा छ ठुलो विनाश ॥

(४)
सौन्दर्य शोभा मृदुता सुवास
गर्दै छ तेरो सब गुप्त-वास ।
अवश्य त्यस्तो दिन आउनेछ
जो त्यो सबै बाहिर ल्याउनेछ ॥

(५)
समाधिमा मग्न कुनै महात्मा-
समान तेरो अहिले छ आत्मा ।
आए पछी उज्ज्वल सिद्धिवेला
त्यस्मा नहोला कुन भक्त भेला ॥

(६)
ए कोपिला ! कोकिल-गानसाथ
सञ्जीवनीतुल्य वसन्त-वात ।
भन्छु म चाँडो अब सन्सनाओस्‌
मुस्कान तेरो मुखमा उदाओस्‌ ॥

(७)
मुहार तेरो ढकमक्क सारा
पक्रेर बग्दा मकरन्द-धारा ।
संसार सौन्दर्य-सुवास-वश्य
झुक्नेछ तेरा पदमा अवश्य ॥

(८)
परागमा लट्पटिँदै सुनौला
बनेर अभ्यागत भृङ्ग नौला ।
झुल्दा र बोल्दा मकरन्दमाथि
हुनेछ आनन्द-विभोर छाती ॥

(९)
के देवता के सरताज राजा
के भीखमङ्गा सबको तँ साजा ।
सुवास लिन्छन्‌ सबले समान
कस्ले नगर्ला गुणकीर्ति-गान ॥

(१०)
संसारमा आज कुनै विशेष
परोपकारी प्रिय वस्तु शेष ।
भेटिन्छ वा मिल्छ भने तँ भिन्न
अर्को कसैको पनि नाम लिन्न ॥