Lalitya bhag 1 ra 2/ganesh stuti

गणेश-स्तुति

(१)
जय गणनायक ! मेरो
हृदय-कमलमा सदा गरी वास ।
दिनमणिले तमको झैँ
गरिदिनुहोस्‌ ! सकल विघ्नको नाश ॥

(२)
प्रभुको सुर, मुनि सबले
निज निज शुभकर्म-सिद्धिको लागि ।
वन्दित चरण-कमलमा
मन-भुमरो होस्‌ अनन्य अनुरागी ॥

(३)
ऋद्धि र सिद्धि दुवैले
सेवित, शिव-पार्वती-तपः-सार ।
प्रभुको उद्‌भव-लीला
सम्झी मन हुन्छ गद्‌गदाऽऽकार ॥

(४)
चन्द्र-मुकुटमा, गालामा-
दूर्वा-माला, कपोलमा भुमरा ।
तुन्दिल मङ्गलमूर्ति
प्रभु स्मरणै छ शान्तिको छहरा ॥

(५)
सिन्दूर-तिलक धारी
वसन्त-बालाऽर्क झैँ अरुण ।
सदय वराऽभय-पाणि
प्रभुको गर्छू झुकी सदा स्मरण ॥