Page:Ritubichar.pdf/75

७९
राम्रो वसन्त झैँ पुच्छ, मैलो हेमन्त झैँ शिर ।
राख्यो शिशिरले खासा चोचो-मोचो दुवै-तिर ॥

८०
पद्मिनीको महावैरी हिमको महिमा गयो ।
मालिन्य-दोषले शून्य सूर्यको बिम्ब देखियो ॥

८१
मिली अब सती प्यारी पद्मिनी यो भनी-कन ।
राम झैँ सूर्य लागे कि उत्तरै-तिर फर्कन ?

८२
वसन्तको कडा कोही अगुवा दूत झैँ गरी ।
मैलो सबै सफा गर्दै सबै-तर्फ चल्यो हुरी ॥

८३
बिचरा पान्थका लेखा भ्रामरीकै दशा-सरी ।
लागी-रहन्छ रस्तामा दुःखदायी चिसो हुरी ॥

८४
हावाको भुमरी-भित्र धुलाको छ उही गति ।
आफना कर्मका साथ जीवको हुन्छ जो गति ॥

८५
माथीबाट झरे सारा पुराना पात बर्बरी ।
शक्ति-शून्य निरुद्योगी भाग्यका भक्त झैँ गरी ॥

८६
लागदा पश्चिमा हावा पुराना दलको स्थिति ।
बदली वृक्षले केही देखाये सप्रने मति ॥

८७
झुत्रा पात थिये अस्ति, झरे आज तिनी सब ।
पालुवा पर्सि देखिन्छ, छैन केही असम्भव ॥