Lalitya bhag 1 ra 2/hiudka din

हिउँका दिन

(१)
मित्र हो ! हिउँका दिन आए
सूर्यले मधुर कान्ति फिँजाए ।
छैन काहिँ झरि बादल वर्षा
हर्षको छ सबमा अब वर्षा ॥

(२)
वेगसाथ बिजुली पनि भागी
त्यै महाघन-घटासँग लागी ।
इन्द्रनील मणि झैं अति जाती
देखियो गगनमण्डल माथि ॥

(३)
देखिए नद-नदीहरु साफ
घामको घटिसक्यो परिताप ।
पान्थका पनि खुले सब रस्ता
लोकलाइ छ बिछट्ट सुबिस्ता ॥

(४)
अन्न पात घरमा हुलि भारी
पूर्ण पारिकन बाँधि भकारी ।
आफना घरघरै ति किसान
मस्त छन्‌ सब अमीर-समान ॥

(५)
सूर्य दक्षिण कुनातिर लत्रे
खुम्चिए कमलका दल झुत्रे ।
लोकबाट गरमी सब भाग्यो
शीतको प्रबलता हुन लाग्यो ॥

(६)
चञ्चले बिजुलि झैँ गरि चट्ट
देखिएर दबिने दिन झट्ट ।
रात-चाहिँ सब छन्‌ अति लामा
काटनै बहुत पर्दछ धामा ॥

(७)
राति फाँटभरमा कुहिराको
राश लाग्दछ घोर मजाको ।
हेरदा शिखरबाट बिहान
देखिने सब कपास-समान ॥

(८)
मानियो सरस चाड तिहार
तापनू छ अब खालि पहार ।
घाममा बस र पुस्तक फोऊ
पाठ घोक, पहिला तिमी होऊ ॥