This page has not been proofread
प्रमाणशाली श्रुति शास्त्र जो छन
अहो ! उनैमा झगडा टनाटन ।
यथार्थ के हो किन छैन मेलन ?
तँलाइ मालुम् छ कि यो कुरा मन ?
कतै छ एकत्व कतै अनेकता
कतै सबै शून्य कतै क्रियात्मता ।
म सत्य मानूँ कसको विवेचन ?
तँलाइ मालुम् छ कि यो कुरा मन ?
श्रुति, स्मृति, तन्त्र, पुराण मन्थन
गरेर बोक्रे झगडा लिईकन ।
यथार्थ जान्यो कसले सनातन
तँलाइ मालुम् छ कि यो कुरा मन ?
जता जता दृष्टि दियो उतैतिर
कथा प्रपञ्चाऽऽदि अनन्त सुन्दर ।
महर्षिले जाल रचे वृथा किन ?
तँलाइ मालुम् छ कि यो कुरा मन ?
पराशर, व्यास, वशिष्ठ, जैमिनि
शुकाऽऽदि जो जो पहिले भए मुनि ।
गए ति के काम गरी कहाँ छन् ?
तँलाइ मालुम् छ कि यो कुरा मन ?
