This page has not been proofread
यात्री
कुन मन्दिरमा जान्छौ यात्री,
कुन मन्दिरमा जाने हो?
कुन सामग्री पूजा गर्ने,
साथ कसोरी लाने हो?
मानिसहरूका काँध चढी,
कुन देवपुरीमा जाने हो?
हाडहरूका सुन्दर खम्बा,
मांसपिण्डका दिवार ।
मस्तिष्कको यो सुनको छानो,
इन्द्रियहरूका द्वार ।
नशा-नदीका तरल तरङ्ग,
मन्दिर आफू अपार ।
कुन मन्दिरमा जान्छौ यात्री,
कुन मन्दिरको द्वार?
मनको सुन्दर सिंहासनमा
जगदीश्वरको राज ।
