This page has been proofread
जिन्दगीको मौसम
जिन्दगीको मौसम रहँदै
खन खन दिलको खेत ।
बाँझो नरहोस् पानी पर्दै
चेतन जल शुद्ध, सफेद ॥
अनन्त ठूलो सागरबाट
घुमी-घुमी मौसम आयो ।
खूब फुल्दछ दिलको माटो
वर्षाले गान सुनायो ॥
इन्द्रिय गोरु शरीर हलोमा
बाँधी-बाँधी खन खन खेत ।
बीउ छन् जगमा कर्म हजारौं
रोप, फुलाऊ लह लह खेत ॥
जिन्दगीको मौसम रहँदै
खन खन, रोप फुलाऊ ।
पर्खन्न कसैकन काल निठुरी
हाय ! यसै ननिदाऊ ॥
रोप रोप सब बीउ सब अहिले
अन्न फलोस् पछिलाई ।
नरुनु पछाडि, आउँछन् जहिले
हिउँद कडा तिमीलाई ॥
