Page:Ritubichar.pdf/77

९७
जडेको छ जथाभावी अवीर पुरमा सब ।
लोकमा वीरकै हुन्छ प्रतिष्ठा, मान, गौरव ॥

९८
वसन्ती रङ्गका वस्त्र पहिरीकन अङ्गमा ।
क्या मजाले डुबेको छ दुनियाँ रसरङ्गमा ॥

९९
यो हो श्रीकृष्णलीलाको रश्मि यौटा पुरातन ।
प्रकाश जसको हामी लिंदै छौं अझ पावन ॥

१००
पूर्णिमा तिथि हो आज पूर्ण भो शिशिरस्थिति ।
भोलि अवश्य देखिन्छ वसन्त मधुराऽऽकृति ॥

१०१
सकल ऋतुविचार प्रेमका साथ हेरी
गुण जति लिनुहोला दोषलाई नटेरी ।
भनि सकल गुणीका सामने भक्तिसाथ
अतिशय झुकि बिन्ती गर्छ यो 'लेखनाथ' ॥

इति शिशिर-विचार
समाप्तं शुभम्