Page:Ritubichar.pdf/24

५३
जलाशयहरू-नेर तुच्छ जीवन-खातिर ।
मरे पनि झुकायेन धीर चातकले शिर ॥

५४
सुन्दा चातकको तेस्तो तिर्खाले व्याकुल ध्वनि ।
नौनी-समान पग्लन्छ छाती पत्थरको पनि ॥

५५
त्यो मानी पक्षीको तेस्तो त्यो पानी-व्रत धन्य छ ।
जसको इन्द्रमा मात्र भक्तिभाव अनन्य छ ॥

५६
अरू साना-तिना पक्षी वनको भित्रभित्र छन् ।
रसिला वृक्षका पत्र उनका दिव्य मित्र छन् ॥

५७
बिचरा ती चरालाई न चाराको उमङ्ग छ ।
न कुनै वन्य-लीलाको भाव-भङ्गि-तरङ्ग छ ॥

५८
ज्वाला-जाल फिँजारेको खडेरी-रूप दानव ।
देखी डरी डरी दप्के किन्नरी झैँ चरी सब ॥

५९
वैलाये घामले राम्रा भरिला पुष्प-पल्लव ।
दारिद्र्यले डढायेका दुःखी झैँ गत-गौरव ॥

६०
माथि माथि सबै-तर्फ फर्र फाली भुवाकन ।
अग्लो सिमल लाग्यो कि सेतो मेघ बनाउन ?

६१
विद्वेषको विशेषज्ञ धीरको मनमा सरी ।
प्रभाव घामको बाक्ला वनमा पर्छ बाहिरी ॥